15. desember 2010

Öryggismál sjómanna

Í síðustu viku hófst formlegt forvarnarsamstarf milli VÍS og Skinneyjar-Þinganess um bætt öryggismál og forvarnir hjá sjómönnum um borð í fiskiskipum útgerðarinnar. Slysavarnaskóli sjómanna er í samvinnu við VÍS um bætt öryggismál og kemur að fræðslu sjómanna í þessu verkefni. Tilgangur samstarfsins er að bæta öryggismenningu um borð í fiskiskipum, leggja auknar áherslur á forvarnir gegn slysum meðal sjómanna ásamt því að gera vinnuaðstæður um borð í skipunum sem öruggastar. Þetta er gert með sameiginlegri skuldbindingu stjórnenda Skinneyjar-Þinganess og sjómanna á skipunum um að stuðla að breyttu viðhorfi og aukinni áherslu á öryggismál sjómanna. Forvarnarsamstarfið var kynnt af fulltrúum VÍS fyrir áhafnarmeðlimum um borð í Ásgrími Halldórssyni SF 250. Frá Slysavarnaskóla sjómanna fóru þeir Hilmar Snorrason skólastjóri og Ingimundur Valgeirsson verkefnastjóri yfir hvernig innleiða skal bætta öryggismenningu um borð. Við innleiðingu verkefnisins var ákveðið að Ásgrímur Halldórsson SF 250 yrði fyrsta skipið til að taka þátt í því en í kjölfarið munu önnur skip útgerðarinnar fylgja á eftir.