6. júní 2011

Áhöfnin á Ásgrími hlýtur viðurkenningu

Á Sjómannadaginn 2011 hlaut áhöfn Ásgríms Halldórssonar SF 250 viðurkenningu frá Slysavarnafélaginu Landsbjörg fyrir að hafa sýnt öðrum fremur góða öryggisvitund á námskeiðum Slysavarnaskóla sjómanna. Skipstjórar eru Ásgrímur Ingólfsson og Sigurður Ægir Birgisson en Sævar Rafn Guðmundsson og Guðmundur Snorri Guðmundsson tóku á móti viðurkenningunni fyrir hönd áhafnarinnar frá Herði Má Harðarsyni formanni Slysavarnafélagsins Landsbjargar. Viðurkenningin sem veitt er árlega er farandbikar sem afhentur er til varðveislu um borð í viðkomandi skipi í eitt ár ásamt veggskildi til eignar. Á myndinni, sem Jón Svavarsson tók, má sjá starfsfólk Slysavarnaskóla sjómanna, fulltrúa áhafnar Ásgríms Halldórssonar SF 250 og Hörð Má Harðarson, formann Slysavarnafélagsins Landsbjargar.